Mahigpit na pinangangalagaan ng batas ang pribadong impormasyon ng mga depositor sa ilalim ng Republic Act No. 1405, o mas kilala bilang Bank Secrecy Law.
Layunin nitong hikayatin ang publiko na gamitin ang banking system sa pamamagitan ng pagbibigay ng katiyakan na ang kanilang pera at impormasyon ay mananatiling ligtas at kumpidensyal.
Ayon sa batas, ang lahat ng deposito sa bangko, kasama ang mga pamumuhunan sa government bonds, ay itinuturing na ganap na confidential kung saan hindi maaaring basta-basta suriin, usisain, o silipin ng sinumang tao, maging ito man ay opisyal ng gobyerno o pribadong indibidwal.
Mahigpit ding ipinagbabawal sa mga opisyal at empleyado ng bangko ang pagbubunyag ng anumang impormasyon hinggil sa mga deposito nang walang pahintulot mula sa depositor.
Gayumpaman, hindi absolute protection ang ibinibigay ng batas. May ilang sitwasyon kung saan pinapayagan ang pagsusuri ng bank deposits. Una, kung may nakasulat na pahintulot ang depositor — kailangang ito ay kusang-loob at may sapat na kaalaman sa magiging epekto ng pagbibigay ng pahintulot.
Ikalawa, maaari ring masuri ang mga deposito sa mga kaso ng impeachment laban sa matataas na opisyal ng gobyerno, kabilang ang Pangulo, Pangalawang Pangulo, mga mahistrado ng Korte Suprema, miyembro ng Constitutional Commissions, at Ombudsman. Saklaw nito ang mga seryosong paratang gaya ng paglabag sa Konstitusyon, pagtataksil sa bayan, panunuhol, at korapsyon.
Ikatlo, pinapayagan din ang pagsusuri kung may utos mula sa isang karampatang hukuman, lalo na sa mga kasong may kinalaman sa panunuhol o kapabayaan sa tungkulin ng mga opisyal ng pamahalaan.
Ikaapat, maaari ring buksan ang bank deposits kung ang mismong perang nadeposito ang paksa ng isang kaso sa hukuman. Sa ganitong sitwasyon, ang pera ay nagsisilbing ebidensya at mahalagang bahagi ng paglilitis.
May kaakibat ding parusa ang paglabag sa Bank Secrecy Law. Ang sinumang mapatunayang lumabag dito ay maaaring makulong ng hanggang limang taon, pagmultahin ng hanggang P20,000, o kapwa ipataw ang dalawang parusa. Subalit ito pa rin ay itinuturing na bailable offense, kaya maaaring makapagpiyansa ang akusado habang dinidinig ang kaso.
Kamakailan, naghain ng reklamo si Manases “Mans” Carpio, asawa ni Vice President Sara Duterte, laban sa Bangko Sentral ng Pilipinas (BSP), Anti-Money Laundering Council (AMLC), at ilang mambabatas. Kaugnay ito ng umano’y pagbubunyag ng kanilang bank transactions sa isang impeachment hearing sa Kamara.
Ayon sa reklamo, labag umano sa Bank Secrecy Law ang naturang disclosure dahil sa likas na pagiging kumpidensyal ng mga bank deposits. Ang insidenteng ito ay muling nagbukas ng usapin hinggil sa balanse sa pagitan ng karapatan sa privacy at ng pangangailangan para sa transparency at pananagutan sa pamahalaan.
